今篇受AXA邀請寫喺診所見到嘅中風個案～
六十餘歲，身體一直都係嗰啲小病小痛小問題，成日喺診所大大聲講馬經嘅，個個姑娘都知佢叫咩名，佢叫滔伯。
因為佢口頭禪係「信我滔伯冇錯喎！」。
有日，佢唔再大大聲講馬經，亦唔再可以活動自如。原本高大威猛嘅佢坐咗喺輪椅上，顯得有啲滄桑落魄⋯由一個我哋從未見過嘅瘦弱婆婆推住佢入診所。
婆婆：「姑娘，佢睇過㗎啦，幫佢登記呀～」
我：「滔伯呀嘛？」
婆婆：「原來呢條村個個都識佢，平時佢肯定俾好多麻煩人，所以個個都記住佢⋯」
我：「唔係啦～滔伯好健談㗎，佢多朋友呀嘛！」
原本健談嘅滔伯一直低頭不語，昔日的笑容亦消失了。
婆婆：「佢呢幾日有兩聲咳，所以帶佢嚟～」
我：「嗯，好呀，坐坐先呀。入得去見醫生嘅嗌你啊～」
婆婆推住滔伯坐埋一邊，拎岀條毛巾仔溫柔的幫滔伯抹汗。
「熱唔熱呀？要唔要俾把風扇仔你吹呀？」婆婆問。
「啊⋯喲⋯呀」，滔伯口齒不清的回應。
中風，摧毀了原本的滔伯。因為腦細胞缺氧受損，令佢身體機能都受到影響。喺未來嘅日子，佢需要努力進行各種康復治療，包括物理治療，職業治療同言語治療。希望可以盡力修復中風為身體帶嚟嘅影響。
「我冇嘢望，唔望發達唔望中六合彩，淨係希望唔駛再推住佢四圍走，望佢自己行得走得，好似以前咁講嘢。起碼都知佢想要乜呀，而家佢講嘢都講唔清，我都分唔到佢係鬧我定嗌肚餓～快啲好返啦，我都想放假呀大老爺～我而家當你係我個孫呀～係咪呀乖孫？」，婆婆邊笑邊輕撫滔伯嘅臉，滔伯嘴角亦輕微上揚。
一個人中風，受到影響嘅唔止自己一個。因為中風患者有好多都會失去自我照顧能力，好多人會連自己行步路都好困難，呢個時候係最需要身邊人嘅支持同照顧。喺你倒下時，有一個為你打點一切 照顧一切嘅身邊人，你已經係最幸福。
唔想中咗招先後悔，不如好好照顧自己，睇下有關預防中風嘅資料喇：
http://bit.ly/29LbZPH
Search